Myfyrwyr Coleg Sir Gâr yn dathlu canlyniadau Safon Uwch rhagorol

Mae myfyrwyr Safon Uwch Coleg Sir Gâr unwaith eto yn dathlu eu llwyddiannau ar ddiwrnod canlyniadau, gan nodi blwyddyn arall o lwyddiant academaidd.  Mae canlyniadau 2024 wedi bod yn arbennig o drawiadol, gyda llawer o fyfyrwyr yn cyflawni graddau rhagorol ac yn sicrhau lleoedd mewn prifysgolion ledled y wlad.  Mae gwaith caled ac ymroddiad y myfyrwyr a’r staff wedi talu ar ei ganfed, gyda nifer o straeon llwyddiant yn dod i’r amlwg mewn gwahanol bynciau.

Enillodd Kiera Meal A A A*

Gorffennodd Kiera ei chyfnod yng Ngholeg Sir Gȃr gyda llwyddiant mawr, gan ennill graddau uchaf A*, A ac A yn ei harholiadau Safon Uwch.  Astudiodd Kiera y gyfraith, seicoleg a chymdeithaseg yn y coleg a bydd yn astudio’r gyfraith ym Mhrifysgol Caerwysg ym mis Medi.

Meddai Kiera:  “Mae’r staff wedi bod mor hyfryd, yn enwedig y tîm lles.  Mae cael gweithio gyda rhai o’r staff eraill gydag undeb y myfyrwyr wedi bod yn lefel wahanol o gysylltiad â bywyd coleg, roedd yn wych.” 

Enillodd Hannah Carpenter A*, A* A

Mae Hannah wedi cwblhau ei harholiadau Safon Uwch yn llwyddiannus gan orffen gydag A*, A* ac A mewn addysg gorfforol, bioleg a seicoleg.  Bydd yn datblygu ei hastudiaethau ym Mhrifysgol Caerfaddon yn astudio gwyddor chwaraeon.

Meddai Hannah:  “Fe wnaeth y coleg fy helpu’n fawr, mae e fel cymuned fawr – roeddwn i’n teimlo fy mod yn cael cefnogaeth dda.  Fe wnaethon nhw fy nghefnogi yn fy astudiaethau, roedd y darlithwyr yn dda am roi deunydd a chyngor i mi.”

Enillodd Jack Kessell A, A, A

Roedd Jack wrth ei fodd yn agor ei ganlyniadau a dysgu bod ei waith caled wedi talu ar ei ganfed gan y bydd nawr yn mynd i Brifysgol Bangor i astudio  meddygaeth - gyda’i freuddwyd o fod yn feddyg o fewn gafael. Enillodd Jack A, A ac A mewn cemeg, bioleg a seicoleg. 

Meddai Jack: “Dw i wrth fy modd, does gen i ddim geiriau. Roeddwn i mor nerfus ond wrth allu edrych ar y graddau hynny, dw i mor mor hapus! 

Enillodd Esther Morris A, A, A

Cafodd Esther ddiwrnod canlyniadau hynod lwyddiannus, gan ennill A, A, ac A mewn hanes, busnes a gwleidyddiaeth.  Hi yw’r person cyntaf yn ei theulu i fynd i’r brifysgol, mae ei theulu mor falch o’i chyflawniad.  Bydd Esther yn astudio cysylltiadau rhyngwladol ym Mhrifysgol Royal Holloway Llundain ym mis Medi eleni.