E-chwaraeon yn amlygu cyfleoedd newydd i fyfyrwyr
Yng Ngholeg Ceredigion, mae math newydd o gystadleuaeth yn dod â myfyrwyr ynghyd mewn diwydiant sy’n tyfu gyda chyfleoedd ar gyfer gyrfaoedd mewn datblygu gemau a ffrydio a rheoli digwyddiadau.
Mae e-chwaraeon, neu chwarae gemau, yn weithgaredd allgyrsiol poblogaidd iawn i fyfyrwyr, sydd â’u tîm coleg eu hunain ac sy’n cystadlu’n rheolaidd ac yn mwynhau dod at ei gilydd, gan gystadlu mewn nifer o wahanol gynghreiriau.
O gynnwrf Rocket League, brwydrau strategol Valorant, neu weithredoedd cyflym Apex Legends, mae chwarae gemau’n fwy nag adloniant, mae’n ffordd i fyfyrwyr gysylltu.
I fyfyrwyr fel Corey Mckenzie Balmont, sy’n astudio gwaith saer, mae chwarae gemau’n frwdfrydedd angerddol. “Rwy’n teimlo’n gryf iawn ynghylch chwarae gemau,” meddai, gan dynnu sylw at sut mae e-chwaraeon yn darparu cyfleoedd i gyfathrebu a chwrdd â phobl newydd.
Mae Finley Hayward, aelod arall o dîm Rocket League y coleg, yn rhannu barn debyg. “Y budd mwyaf yw’r ystod eang o bobl rydych chi’n cwrdd â nhw wrth gystadlu mewn gemau rydych chi’n mwynhau,” meddai. “Rwy’n dysgu sgiliau megis gwaith tîm a chyfathrebu dan bwysau.”
Eleni, mae tîm y coleg wedi cystadlu mewn cystadlaethau Valorant, Rocket League, Apex Legends a PUBG ac yn y gwanwyn, byddan nhw’n cystadlu ym Mhencampwriaethau Myfyrwyr Agored E-chwaraeon Prydain mewn Rocket League a Valorant.
Gorffennodd tîm Rocket League y coleg yn y pumed safle yn eu cynghrair yn ystod Pencampwriaethau Myfyrwyr Agored y Gaeaf. Llwyddon nhw hefyd i gyrraedd camau grŵp Apex Legends, gan gymhwyso ar gyfer y rowndiau terfynol a byddan nhw’n cystadlu eto eleni.
Cynhaliwyd twrnamaint PUBG am y tro cyntaf eleni gyda myfyrwyr ond yn cael cystadlu ar eu ffonau symudol. Mwynheuon nhw hyn a byddan nhw’n parhau i gymryd rhan.
Anogir myfyrwyr i ymuno â’r tîm e-chwaraeon nid yn unig o fewn cyrsiau cyfrifiadura ond ar draws y coleg cyfan
Aled Richards, darlithydd mewn technoleg gwybodaeth, sy’n arwain y fenter e-chwaraeon yng Ngholeg Ceredigion. “Y rheswm rwyf wedi dewis ymwneud ag e-chwaraeon yw’r ffaith eu bod yn rhoi cyfleoedd allgyrsiol i’n myfyrwyr mewn maes sy’n tyfu y bydd y mwyafrif o fyfyrwyr yn ei fwynhau,” meddai. “Mae e-chwaraeon yn galluogi myfyrwyr i ddatblygu eu sgiliau tîm, meddwl yn feirniadol a’u sgiliau rheoli amser. Mae’n eu galluogi i gysylltu â chymheiriaid sy’n rhannu diddordebau tebyg ac maen nhw’n gallu rhyngweithio â chwaraewyr o golegau a rhanbarthau eraill y DU.”
Yng Ngholeg Ceredigion, mae’r holl gyfrifiaduron ac ategolion ar gyfer e-chwaraeon ar gampws Aberystwyth yn gemau Alienware o safon y diwydiant.
Ychwanegodd y darlithydd Aled Richards: “Mae chwarae e-chwaraeon yn gwella gwytnwch meddyliol myfyrwyr ac yn eu galluogi i ymdopi â phwysau mewn amgylcheddau cystadleuol, gan wella eu galluoedd i gadw ffocws a chadw’n ddigyffro.
“Mae yna lawer o gyfleoedd addysgol a gyrfaol ar gael ac mae hygyrchedd y gamp yn brif elfen gadarnhaol gan fod myfyrwyr o bob gallu yn medru cymryd rhan waeth beth fo’u cyflyrau corfforol a meddyliol.
“Mae e-chwaraeon y rhoi cyfle i fyfyrwyr gael hwyl a chystadlu mewn chwarae gemau yn gystadleuol gyda’i gilydd fel tîm. Mae’n rhoi cyfle iddynt wneud ffrindiau newydd, datblygu eu sgiliau a chystadlu mewn twrnameintiau cenedlaethol yn erbyn colegau o bob cwr o’r DU, fel camp y gall unrhyw un chwarae a mwynhau.
Meddai’r fyfyrwraig Megan Mai Jones, a wnaeth gystadlu ym Mhencampwriaethau Myfyrwyr Agored E-chwaraeon Prydain Valorant: “Rwy’n hoffi cwrdd â phobl sy’n chwarae gemau rwy’n eu hoffi a chael cymdeithasu wrth wneud rhywbeth rydych chi’n mwynhau.”
