Myfyrwyr gofal anifeiliaid yn elwa o sesiynau sŵ wythnosol
Mae myfyrwyr ar raglenni gofal anifeiliaid ar gampws Aberystwyth Coleg Ceredigion yn elwa o sesiynau ymarferol wythnosol yn Animalarium y Borth lle maen nhw’n astudio ystod eang o anifeiliaid o gwningod i eifr i ddreigiau barfog a phryfed brigyn.
Mae’r bartneriaeth yn sicrhau bod yr holl fyfyrwyr ar gyrsiau gofal anifeiliaid, waeth beth fo’u lefel astudio, yn cymryd rhan mewn sesiwn hanner diwrnod wythnosol yn y sŵ sy’n cael ei chyflwyno gan ddarlithwyr coleg.
Maen nhw’n dysgu oddi wrth ystod eang o anifeiliaid gan gynnwys anifeiliaid egsotig, adar, mamaliaid bach, cŵn, ceffylau a geifr, gyda phob grŵp yn dod â’i set ei hun o ofynion iechyd a lles.
Mewn sesiwn ddiweddar, bu June Lincoln, darlithydd gofal anifeiliaid yng Ngholeg Ceredigion, yn tywys myfyrwyr drwy ystod o wiriadau iechyd anifeiliaid, gan ddefnyddio ei gwybodaeth helaeth a rhai pryfed o’i chasgliad hi ei hun, gan gynnwys miltroediaid a sgorpionau.
Fe gyflwynodd hi Ariel, neidr ŷd goch fenywaidd llawn dwf tua 4 troedfedd o hyd. Esboniodd sut y gallant ddefnyddio dirgryniad a synnwyr arbenigol o’r enw organ jacobson i ganfod ysglyfaeth.
Fe wnaethant hefyd wirio iechyd draig farfog sy’n tarddu o Awstralia ac sydd angen goleuadau uwchfioled a gwres i oroesi mewn caethiwed. Eglurodd June hefyd i fyfyrwyr bwysigrwydd maethiad cywir ac ychwanegion wrth fwydo ymlusgiaid i atal clefyd esgyrn metabolig a achosir gan ddiffyg calsiwm.
Mae’r bartneriaeth hon yn galluogi myfyrwyr i archwilio a gweithio’n agos gydag amrywiaeth o rywogaethau fel geifr pigmi, cwningod bach a mawr, moch cwta, ffuredau, llygod a llygod mawr, yn ogystal â walabïaid, monitoriaid ackie, chameleonod a nadroedd gwasgu ymhlith eraill.
Mae Coleg Ceredigion yn cynnig cyrsiau gofal anifeiliaid o lefel un, sy’n gymhwyster mynediad, i lefel tri, sy’n gyfwerth â thri chymhwyster Safon Uwch ond sy’n fwy ymarferol eu natur ac sy’n seiliedig ar aseiniadau yn bennaf.
Mae gan fyfyrwyr y coleg fynediad i gyfleuster ceffylau o’r radd flaenaf i weithio gyda cheffylau a hefyd cyfleuster cyndy newydd gydag amrywiaeth o fridiau o gŵn.
Dywedodd Joshua Clements, myfyriwr gofal anifeiliaid lefel dau yng Ngholeg Ceredigion sy’n arbennig o hoff o fridiau egsotig: “Rwy’n eithaf mwynhau elfennau ymarferol y cwrs, felly mae’r ymweliadau hyn yn wych i mi, lle rydym yn cael ein hannog i drin pob math o anifeiliaid a bridiau egsotig.
“Rwy’n hoffi pob anifail ond pan ddechreuais i’r coleg roeddwn yn ansicr ynghylch ceffylau, ond mae’r cwrs wedi fy helpu i oresgyn hynny felly rwyf bellach yn gyfforddus ac yn hyderus o’u cwmpas yn yr iard geffylau.”
