Beth wnaeth eich ysbrydoli i ddilyn gyrfa mewn therapi harddwch?
Rwyf wedi bod â diddordeb mewn iechyd a lles erioed, ac roedd therapi harddwch yn edrych fel y cyfuniad perffaith o’r ddau.
Nid yw’n ymwneud ag edrych yn dda yn unig, ond am deimlo’n dda hefyd, yn gorfforol ac yn feddyliol. Mae gan driniaethau fel triniaethau i’r wyneb, tyliniadau, ac arferion gofal croen y fath effaith gadarnhaol ar les cyffredinol pobl, ac roeddwn i am fod yn rhan o hynny.
Yn ogystal, mae gwell gen i waith ymarferol, gweithredol dros eistedd wrth ddesg, a hynny’n union y mae therapi harddwch yn ei gynnig. Mae pob diwrnod yn wahanol, ac rydych yn rhyngweithio’n gyson gyda chleientiaid ac yn defnyddio eich sgiliau mewn ffordd ffisegol, real iawn. Mae’n yrfa ddynamig sy’n dal fy niddordeb ac yn gwneud i mi deimlo boddhad.
Allwch chi roi cipolwg i ni ar eich taith broffesiynol a phrofiad yn y diwydiant harddwch?
Dechreuodd fy nhaith yn y diwydiant harddwch gyda brwdfrydedd angerddol dros ofal croen a lles.
Bûm yn gweithio mewn nifer o salonau a sbaon, yn arbenigo mewn triniaethau i’r wyneb, triniaethau gofal croen a therapi tylino. Dros y blynyddoedd, rwyf wedi cael y cyfle i weithio gydag amrywiaeth eang o gynhyrchion ac i ddysgu technegau uwch, sydd wedi mireinio fy nealltwriaeth o wahanol fathau o groen a chyflyrau.
Wrth i mi ennill mwy o brofiad, sylweddolais fod gen i ddiddordeb brwd mewn addysgu a rhannu fy ngwybodaeth gydag eraill. Arweiniodd hyn i mi symud i mewn i addysg, a bellach rwy’n addysgu therapi harddwch ac wedi bod yn addysgu ers 2002. Rwyf wrth fy modd yn gweithio gyda myfyrwyr sydd newydd gychwyn ar eu taith yn y diwydiant harddwch. Mae’n anhygoel o werth chweil eu gwylio’n tyfu mewn hyder a sgil wrth iddynt ddatblygu eu harddulliau unigryw a’u hagweddau tuag at harddwch.
Rwyf hefyd wedi cael hyfforddiant fel therapydd chwaraeon oherwydd roeddwn i am ehangu fy ngwybodaeth ac roedd yn gweithio’n dda gyda fy nghymwysterau harddwch. Felly es i nôl i’r coleg a hyfforddi fel therapydd chwaraeon ac mewn anafiadau chwaraeon gyda diplomâu lefel dau a thri. Fe wnaeth fy nhaith broffesiynol fel therapydd chwaraeon ddatblygu gyda diddordeb brwd ar gyfer iechyd a ffitrwydd. Rwyf wedi fy nghyfareddu erioed gan y corff dynol a’r modd y mae’n symud, yn enwedig o ran atal anafiadau ac adferiad.
Ar ôl cwblhau fy hyfforddiant, enillais brofiad yn gweithio gydag athletwyr, timau chwaraeon, ac unigolion oedd yn gwella o anafiadau. Rhoddodd hyn sylfaen gref i mi mewn tylino chwaraeon, adsefydlu, a thrin anafiadau.
Agorais fy musnes fy hun yn Aberystwyth yng Ngrŵp Meddygol Ystwyth yn arbenigo mewn micrografu croen yr wyneb ac anafiadau chwaraeon ac roedd helpu unigolion wella o anafiadau ac adennill eu nerth yn anhygoel o werth chweil. Mwynheuais i’r her o ddiagnosio a thrin amrywiol gyflyrau a’r boddhad o weld cleientiaid yn dychwelyd i’w potensial llawn oedd yr hyn wnaeth fy symbylu bob dydd. Helpu rhywun i wella o anaf personol - roeddwn i wrth fy modd yn bod yn rhan o’u taith i wellhad a gweld y gwahaniaeth y gallai triniaeth effeithiol wneud yn eu bywydau.
Pan symudais i addysgu ar ôl ennill fy nghymhwyster addysgu ym Mhrifysgol Llanbedr Pont Steffan, cefais y profiad o rannu fy ngwybodaeth gyda myfyrwyr oedd yn awyddus i ddysgu am therapi harddwch a chwaraeon yn hynod o werth chweil. Mae addysgu’n caniatáu i mi gyfuno fy mhrofiad ymarferol gydag ochr academaidd y pwnc, gan helpu myfyrwyr ddeall theori a chymhwysiad ymarferol technegau therapi harddwch a chwaraeon ill dau. Rwy’n angerddol ynghylch rhoi iddynt y sgiliau a’r hyder sydd eu hangen arnynt i lwyddo.
Sut all myfyrwyr gadw’n gyfoes gyda’r tueddiadau a’r technegau diweddaraf yn y diwydiant harddwch?
Datblygiad Proffesiynol Parhaus Cofrestru ar gyrsiau byr neu ddiplomâu uwch mewn triniaethau harddwch newydd, technolegau gofal croen, neu gyrsiau chwaraeon.
Digwyddiadau Byw: Mynychu sioeau masnach harddwch (fel Beauty UK neu Salon International), a chynadleddau, ble gallwch chi archwilio’r datblygiadau arloesol a thechnegau mwyaf diweddar.
Cylchgronau masnach harddwch: Mae cyhoeddiadau fel Professional Beauty, Salon Business, a chylchgrawn Scratch yn werthfawr ar gyfer cael diweddariadau ar dueddiadau, offer a thechnegau diweddaraf y diwydiant.
Cylchlythyrau: Mae llawer o frandiau a chyrff y diwydiant yn cynnig cylchlythyrau i’ch cadw’n gyfoes ynghylch datblygiadau newydd.
Pa gyngor fyddech chi’n rhoi i fyfyrwyr sy’n gobeithio mynd i mewn i faes therapi harddwch?
Archwiliwch wahanol rannau oherwydd mae therapi harddwch yn eang; mae’n cynnwys gofal croen, ewinedd, tylino, rhoi colur, a llawer mwy. Rwy’n cynghori myfyrwyr i roi cynnig ar wahanol rannau yn ystod ei hastudiaethau er mwyn darganfod eu diddordebau brwd a’u cryfderau.
Mae ardystiadau yn bwysig at ddibenion yswiriant: Gwnewch hyn siŵr eich bod yn cofrestru ar gyrsiau achrededig (megis VTCT neu CIBTAC) a chanolbwyntiwch ar ennill cymwysterau a gydnabyddir gan gyrff y diwydiant, megis BABTAC neu FHT.
Dylai myfyrwyr arddangos eu gwaith a dogfennu popeth gyda ffotograffau cyn-ac-ar ôl neu greu portffolio yn amlygu eu triniaethau neu edrychiadau colur gorau. Mae hyn yn eu helpu i sefyll allan wrth ymgeisio am swyddi a denu cleientiaid.
Byddwn i’n annog myfyrwyr i ddefnyddio platfformau fel Instagram neu TikTok i rannu eu gwaith, aros mewn cysylltiad â’r gymuned harddwch, a denu darpar gleientiaid.
Sut ydych chi’n ymlacio ac ymarfer hunan-ofal?
Rwy wrth fy modd yn treulio amser gyda theulu a ffrindiau, ac edrych ar ôl Murphy, ci fy merch. Rwy’n dwlu ar fath poeth, canhwyllau ac ymlacio gyda llyfr. Dyna yw fy amser i. Hefyd rwy’n mwynhau gwyliau ac archwilio lleoedd newydd, ond yn fwyaf oll treulio amser gyda fy nheulu sy’n fy ngwneud i’n hapus.