Beth wnaeth eich ysbrydoli i ddilyn gyrfa mewn therapi harddwch?

A dweud y gwir doeddwn i ddim yn gwybod beth i’w wneud pan adewais i’r ysgol. Roedd rhaid i mi fynd i’r coleg a dewis cwrs i wneud oherwydd fedrwn i ddim bod yn achubwr bywyd yn fy mhwll nofio lleol am byth, rhywbeth roeddwn i’n meddwl byddai’n ddewis gyrfaol gwych ar y pryd.

Dewisais i therapi harddwch oherwydd roeddwn i’n mwynhau gwneud fy aeliau o oed ifanc, yn bennaf oherwydd roedd fy aeliau’n cyffwrdd yn y canol ac roeddwn i’n casáu hynny. Roeddwn i wrth fy modd gyda phobl ac yn arbennig roeddwn i’n hoffi helpu eraill gyda’u haeliau. Doeddwn i ddim mewn cariad yn syth gyda therapi harddwch pan oeddwn i yn y coleg, daeth hynny’n hwyrach pan ddechreuais i weithio ar wahanol gleientiaid mewn sbaon a salonau. Byddwn i’n ffynnu ar wneud fy nghleientiaid yn hapus a gwneud yn siŵr fy mod wedi rhoi’r profiad gorau iddynt. Byddwn i bob amser yn mynd yn rhy hoff o’m cleientiaid ac yn dwlu clywed am eu diwrnod a beth roedden nhw wedi bod yn ei wneud ers eu hapwyntiad diwethaf.  

Allwch chi rannu ychydig am eich taith broffesiynol?

Mae gen i ddiddordeb brwd mewn triniaethau i’r wyneb a thriniaethau uwch i’r wyneb. Rwy wrth fy modd yn addysgu’r cyfuniad o ymlacio trwy dylino a thriniaethau rhagnodol uwch i’r wyneb, wedi’u teilwra ar gyfer pob cleient a’i math o groen. Mae obsesiwn gen i gydag aeliau a thrawsnewid ymddangosiad cyfan cleient gyda thintio a chwyro. Byddwn i wastad yn cymryd fy amser gydag aeliau cleient a gwneud yn siŵr bod siâp ac arlliw’r tint yn berffaith ar gyfer ei (g)wallt a siâp ei (h)wyneb. Rwy’n ei weld fel celfyddydwaith sy’n cael ei arddangos ar wyneb cleient i bawb ei weld. Byddwn i wastad yn rhedeg dros amser gydag aeliau a dod i drafferth achos bod fy holl golofn ddim yn cydfynd oherwydd beth ddylai fod wedi bod yn dasg siapio aeliau cyflym. 

Syrthiais i i mewn i addysgu oherwydd fy iaith Gymraeg, roedd yna ddarparwr hyfforddiant bach yn Aberystwyth oedd angen aseswr oedd yn siaradwr Cymraeg rhugl. Dechreuais i addysgu cyfuniad o wallt a harddwch lefel un mewn ysgolion ac roeddwn yn gwybod ar unwaith mai addysgu therapi harddwch oedd y llwybr gyrfaol mwyaf rhagorol, gwerth chweil i fod arno. Fy nghyrchnod hirdymor oedd addysgu therapi harddwch lefel tri a llwyddais i gyflawni hyn o’r diwedd y llynedd. 

Sut ydych chi’n cadw’n gyfoes gyda’r tueddiadau a’r technegau diweddaraf yn y diwydiant harddwch?

Rwy’n mwynhau uwchsgilio ac rwy’n dal i fod yn llawn cyffro wrth ddysgu triniaethau a thechnegau newydd. Rwy’n cofrestru’n rheolaidd ar gyfer gwahanol driniaethau i’r wyneb er mwyn gwneud yn siŵr fy mod yn gyfoes o ran peiriannau a chynhyrchion newydd. Yn ystod yr ychydig flynyddoedd diwethaf o addysgu rydyn ni wedi trwytho ein hadran i gystadlu yng Nghystadleuaeth Sgiliau Cymru a chystadlaethau WorldSkills y DU. 

Pa gyngor fyddech chi’n rhoi i fyfyrwyr sy’n gobeithio mynd i mewn i faes therapi harddwch?

Byddwn i’n annog myfyrwyr i ymweld â’u coleg lleol ar gyfer noson agored ac efallai siarad â myfyrwyr presennol ac unrhyw un eu bod efallai yn eu hadnabod sy’n gweithio yn y diwydiant, er mwyn gwneud yn siŵr y byddai’n yrfa ddewisol y gallen nhw weld eu hunain ynddi. Mae therapi harddwch yn swydd flinedig, sy’n gofyn llawer ond mae’r gwobrau yn gorbwyso hyn yn helaeth os ydych yn berson gofalgar sy’n ymdrechu at berffeithrwydd yn eich gwaith. 

Sut ydych chi’n ymlacio ac ymarfer hunan-ofal?

Rwy’n mwynhau gwylio fy mhlant yn gwneud eu gweithgareddau amrywiol gyda’r nos, fel marchogaeth, rygbi a nofio. Rwy’n berson sy’n caru cŵn ac rwy’n mwynhau cerdded milltiroedd gyda fy nghi ar y penwythnosau. Ond ar gyfer fy hunan-ofal fy hun rwy’n hoffi nofio, nid padlo’n hamddenol ond nofio dull rhydd am bellter hir. Mae hyn yn helpu cadw fi’n ffit ac mae’n clirio fy mhen. 

Beth wnaeth eich ysbrydoli i ddilyn gyrfa mewn therapi harddwch?

Roeddwn i bob amser yn ei chael yn anodd yn academaidd yn yr ysgol ac roeddwn i bob amser yn fwy ymarferol ac yn dwlu ar weithgareddau ymarferol. Mewn gwirionedd, nid harddwch oedd fy newis cyntaf ac fe ges i drafferth o ran beth roeddwn i am wneud fel gyrfa. 

Gwnes i harddwch oherwydd es i i gael rhai triniaethau cyn bod fy chwaer yn priodi. Mwynheuais i’n fawr gwylio’r therapydd ac oherwydd fy mod yn gofyn cymaint o gwestiynau fe wnaeth hi droi a dweud, “pam na wnewch chi gwrs harddwch?” Felly dyna beth gwnes i. Cofrestrais i ar gwrs harddwch rhan-amser ac roeddwn i wrth fy modd gyda fe. Roeddwn i wedi dod o hyd i rywbeth roeddwn i’n dda’n ei wneud ond roeddwn i hefyd yn ei fwynhau. 

Allwch chi rannu ychydig am eich taith broffesiynol?

Gadewais i’r coleg ac roeddwn yn ddigon ffodus i gael cynnig swydd yn Sba Neuadd Ragdale o ganlyniad i fod yno ar brofiad gwaith. Gwnes i fy nghyfnod prawf tri mis ond penderfynais ddilyn fy mhartner oedd wedi cael swydd fel athro yn Essex ac roeddwn yn ddigon ffodus i gael swydd mewn Salon yn Chigwell. Mwynheuais i fy amser yno yn fawr iawn ac mewn gwirionedd yr hyfforddiant ces i gwnaeth fi’r therapydd ydw i nawr.

Wedyn penderfynon ni symud adref i Gymru a gweithiais i mewn Salonau a Sbaon yn yr ardal leol. Yna penderfynais i ddechrau fy musnes fy hun. 

Roedd addysgu’n rhywbeth oedd o ddiddordeb i mi felly gwnes i gwrs cyflwyniad i addysgu ac wedi hynny roeddwn yn lwcus i gael lle ar gwrs TAR. Fe wnes i gwblhau blwyddyn a daeth swydd wag yng Ngholeg Ceredigion felly penderfynais i roi cynnig amdani gan ei bod mor agos i gartref. Llwyddais i gael cynnig rhai oriau addysgu ac mae’r gweddill yn hen hanes.

10 mlynedd yn ddiweddarach ac rwy’n dal i fod wrth fy modd yn addysgu therapi harddwch ar bob lefel. Rwy’n dwlu gwneud ewinedd, triniaethau i’r traed a’r wyneb ond rwy wrth fy modd gyda phob triniaeth harddwch i fod yn onest. 

Sut ydych chi’n cadw’n gyfoes gyda’r tueddiadau a’r technegau diweddaraf yn y diwydiant harddwch?

Rwy’n dal i weithio yn y diwydiant felly mae hynny’n cadw fy sgiliau’n gyfoes ac yn fy nghadw’n gyfoes gyda’r tueddiadau yn ogystal â mynychu hyfforddiant ychwanegol.

Pa gyngor fyddech chi’n rhoi i fyfyrwyr sy’n gobeithio mynd i mewn i faes therapi harddwch?

Dilynwch eich breuddwydion a pheidiwch fyth â rhoi i fyny achos mae unrhyw beth yn bosibl os gwnewch chi ond cadw ati a chredu ynoch chi eich hun.

Sut ydych chi’n ymlacio ac ymarfer hunan-ofal?

Treulio amser gyda fy nheulu (mae’n deulu prysur iawn gyda thri o blant, gŵr a chi) ac rwy wedi ymuno â chôr yn ddiweddar.